(၆) လကြာ ပြုလုပ်ခဲ့သော အဆိုပါ သင်တန်းကာလအတွင်း သင်တန်းသားများသည် ဌာနအသီးသီးသို့ လှည့်လည်တာဝန်ထမ်းဆောင်ရင်း လက်တွေ့အတွေ့အကြုံများ ရရှိခဲ့ကြပြီး ဆက်ဆံရေးစွမ်းရည်၊ အသင်းအဖွဲ့ဖြင့် ပူးပေါင်းဆောင်ရွက်မှု၊ အချိန်စီမံခန့်ခွဲမှု၊ ပြဿနာဖြေရှင်းမှုနှင့် အသက်မွေးဝမ်းကျောင်းဆိုင်ရာ ကျွမ်းကျင်မှုများကို ဖွံ့ဖြိုးတိုးတက်စေခဲ့ပါသည်။ သင်တန်းတွင် ဌာနအလိုက် ပြောင်းရွှေ့တာဝန်ထမ်းဆောင်ခြင်း၊ လက်တွေ့တာဝန်များ ဆောင်ရွက်ခြင်း၊ လမ်းညွှန်ပြသပေးခြင်း (Mentoring)၊ သင်ယူမှုနှင့် ဖွံ့ဖြိုးတိုးတက်ရေးဆိုင်ရာ အစီအစဉ်များ၊ ကြီးကြပ်သူများ၏ အကဲဖြတ်ဆန်းစစ်မှုများနှင့် နောက်ဆုံးအဆင့် တင်ပြချက် (Presentation) တင်သွင်းခြင်းတို့ ပါဝင်ပါသည်။

ဤအစီအစဉ်ကို ဘွဲ့ရခါစ လူငယ်များနှင့် လုပ်ငန်းအတွေ့အကြုံ အနည်းငယ်သာရှိသေးသူများအတွက် ရည်ရွယ်ပြင်ဆင်ထားခြင်းဖြစ်ပြီး အသေးစားငွေရေးကြေးရေးလုပ်ငန်းကဏ္ဍအတွင်းရှိ မတူညီသော လုပ်ငန်းဆောင်တာများကို လေ့လာခွင့်နှင့် သင့်တော်သော အသက်မွေးဝမ်းကျောင်း လမ်းကြောင်းများကို ရှာဖွေဖော်ထုတ်နိုင်မည့် အခွင့်အရေးများကို ပံ့ပိုးပေးပါသည်။

Batch-4 ကို အောင်မြင်စွာ ပြီးမြောက်နိုင်ခဲ့ခြင်းနှင့်အတူ စထာပါနာသည် လူငယ်လူရွယ် အရည်အချင်းရှိသူများကို ပြုစုပျိုးထောင်ပေးရန်နှင့် အနာဂတ်ခေါင်းဆောင်မှု အခန်းကဏ္ဍများအတွက် လုပ်ဆောင်ရည်မြင့်မားသော ဝန်ထမ်းများကို မွေးထုတ်ပေးရန် ထားရှိသော ကတိကဝတ်အတိုင်း ဆက်လက်လုပ်ဆောင်လျက်ရှိပါသည်။